Kumpulan Nasehat (Hadih Madja) Aceh

0
Source: radarmiliter.blogspot.co.id

Adat

Adat bak Poe Teu Meurehom

Hukum bak Syiah Kuala

Qanun bak Putroe Phang

Reusam bak Laksamana

 

Adat raja bakna rakyat

Adat meukat dong bak ria

Adat panglima bakna teukaboe

Adat kanto meutuleh baca

 

Adat umong meubak ateung

Adat ureung meupetua

Adat pague bakna beunteung

Bak babah lhueng bakna runja

 

Bak

Bak si buta bek yue beut kitab

Bak si bangsat bek yue meudo'a

Bak musoh bek lakee bantu

Bak madu bek lakee peunawa

 

Bek peusaban kai ngon aree

Bek peusaban naleh ngon gunca

Barang gapeu buet bek teumiree

Bak meuguree jiet sempurna

 

Bek

Bek peukeupok padee tan asoe

Bek boh tajoe bak manok patah

Bek tabaloh pukat tan taloe

Bek reugam jaroe bak buloh beukah

 

Bak ie rajok bek tatheun ampeh

Bak ie tireh bek tatheun bubee

Bek tameungon deungon si paleh

Hareuta habeh geutanyo malee

 

Bak rang patah bek tapeh binteh

Bak beulhong tireh bek talheung tika

Buet lam pakat hate beukaleh

Bek arang habeh beuso han pija

 

Sansui beuneung puwo bak ilang

Aneuk manyak moe puwo bak nang

Bek meteudong bak on jeulatang

Diteuka gatai ban saboh badan

 

Bek talet gajah ka u glee

Bek tik kawee dalam ie tuba

Bek tob galah bak tanoh cayee

Bak kayee matee bek tatak tanda

 

Bek meuhaba bak ureung tuloe

Bek peuceudah droe bak ureung buta

Ta ceutit kulet saket lam asoe

Salah keudroe han ta cici rasa

 

Cilaka

Cilaka rumoh hana tampong

Cilaka gampong rumoh hana sapat

Cilaka wareh hantem kunjong munjong

Cilaka untong hana hareukat

 

Geunaseh

Geunaseh keubee bak wue tubee

Geunaseh asee tajok u muda

Geunaseh leumo bak raga naleung

Geunaseh ureung tajok rupiah

 

Hukom

Adat meukong reubong

Hukom meukoh purieh

Adat barang gapat jiet takhong

Hukom barang gapat hanjeut takieh

 

Hukom Lellah sumpah bek

Hukom ade pake bek

Hukom adat ikat bek

Hukom meujroen meupoh bek

 

Keumeung

Keumeung keu seunang ta peuget rumoh

Keumeung keu mehmoh meukawen dua

Keumeung keu kaya tajak ceumatok

Keumeung keu krek krok ta meuniaga

 

Leumoh

Leumoh tanoh keubeu meukubang

Leumoh geudubang di gob panglima

Leumoh nanggroe sabee dalam prang

Leumoh parang beuso tan meulila

 

Leumoh hukom di atoe le pangkat

Leumoh adat jahee raja

Leumoh kanun tinggai bak kalam

Leumoh reusam gadoh budaya

 

Meuyoe

Bek ta pula trieng meuduro dilikot rumoh

Meunyoe tacah bagah timoh

Meunyoe takueh bungka tanoh

Meunyo tatoet tutoeng rumoh

 

Meunyoe tan ileume hukom han putoh

Meunyoe han peng maksud han troh

Meunyo tan akai binasa tuboh

Meunyo tan useuha reuziki pih jioh

 

Meuleuha

Meuleuha langai watee me'ue blang

Meuleuha parang watee cah paya

Meuleuha pa'I watee nanggroe prang

Meuleuha pawing dalam glee raya

 

Pantang

Pantang peudeng meulinteng sarong

Pantang rincong meubalek mata

Pantang ureung diteuoh kawom

Pantang hukom ta pejeut peukara

 

Pantang bajee meubalek takue

Pantang silluewe me balek suja

Pantang inong meulakee bak madu

Pantang tengku hana jeut aleh ba

 

Peulara

Peulara mie mangat drop tikoh

Peulara asee mangat geudroh

Peulara musang manok geupajoh

Peulara ureung jeut ke musoh

 

Rampak

Rampak langet karena bintang